YONDER HARTSFEES GAAN NIE VOORT SOOS BEPLAN EINDE AUGUSTUS 2020 NIE

 

Die jaar 2020 het ons almal onkant gevang met die aankondiging van die Nasionale Ramp wat veroorsaak is deur die Covid-19 pandemie.  Dit het gemaak dat ons, soos al die ander feeste en organisasies moeilike besluite moes neem. ‘n  Moeilike besluit is geneem met die skuif van die datum na 26-29 Augustus 2021.

 

  • Die feit dat ons in Julie steeds in vlak 3 van die Covid-19 regulasies is en massa byeenkomste nie kan plaasvind nie, is die aanbied van ‘n fees in Augustus nie haalbaar nie.
  • Die Covid-19 pandemie in die Noord-Kaap het nog nie sy piek bereik nie en die verwagting is eers teen September 2020.
  • Dit is die plig van die Feeskomittee om die veiligheid van die personeel asook die feesgangers te verseker.
  • Die moontlikheid om toestemming te kry om later in die jaar ‘n fees aan te bied is volgens die Noordkaap Rampbestuurskomitee nie haalbaar nie.

Die beste wat ons kan doen is om positief te bly, aan te pas by die situasie, vernuwend en kreatief te dink en hierdie pandemie te oorleef sodat, as ons tot normaal terugkeer die beste moontlike Yonder Hartsfees te kan aanbied. Die fees bestuur is reeds besig om deeglik te beplan en voor te berei vir die Yonder Hartsfees 2021.

  • Groter fokus gaan gegee word aan gesinsvermaak en ‘n feestelike atmosfeer.
  • Sport aktiwiteite soos padfiets-, bergfiets- en veldwedlope asook sport soorte vir die persoon met ‘n gestremdheid word op groter skaal aangebied. Daar word reeds ‘n bergfiets en 4x4 baan ontwikkel.
  • Die feesterrein word verder ontwikkel:
    • Meer grasperke word aangelê.
    • Parkeerterrein word verbeter met ‘n harde ry oppervlak.
    • Die stof in die pretpark word aangespreek.
    • Verandering word aan die uitleg van die terrein gedoen.
    • Bome word aangeplant en fasiliteite verbeter.
  • Kunstenaars wat reeds hierdie jaar bespreek is, word oorgedra na volgende jaar en toneelstukke word beplan.
  • Soos altyd sal die pretpark, kosmark en kunsmark weer ‘n hoogtepunt wees.
  • ‘n Verskeidenheid demonstrasies en vertonings word beplan. Hou ons program dop as dit verskyn.

 

Vir meer inligting skakel of stuur gerus navrae aan: mail.yonder@gmail.com

 

 

Yonder Hartsfees – Skop jou skoene uit!

As jarelange tuiste vir persone met ‘n intellektuele gestremdheid het Yonder geen bekendstelling nodig nie.  Verlede jaar 2019 het ons die 1ste Yonder Hartsfees met groot sukses aangebied en vanjaar 2020 doen ons dit weer.

Die Noord-Kaap Geestesgesondheidsvereniging  sien daagliks na 280 persone met ‘n intellektuele gestremdheid om.  Yonder is beide ‘n permanente tuiste vir baie van hierdie mense, maar ook ‘n veilige hawe vir dagbesoekers.  Na ‘n deeglike assessering en vaardigheidsopleiding word baie van die persone uitgeplaas in die gemeenskap waar hulle met groot sukses by plaaslike besighede werk.  Daar is egter ook van Yonder se inwoners en dagbesoekers wat nie uitgeplaas kan word nie, maar wat daagliks hul take by een van Yonder se agtien werkswinkels op die terrein verrig.  Menswaardigheid is een van die grootste doelstellings van die instelling en elke persoon wat by dié besonderse instansie betrokke is weet hulle maak elke dag ‘n verskil, hulle is belangrik en hulle het soveel talente waarvan die gemeenskap net eenvoudig móét weet. Dus gaan ons voort met hierdie jaarlikse fees vir Kimberley en omgewing ten einde hulle vaarighede en fasiliteite ten toon te stel, maar natuurlik ook vir fondsinsameling.

Die feeskomitee is reeds aan die werk en menige rolspelers in die sakesektor van Kimberley is opgewonde om Yonder se hande te sterk en saam met hulle te werk om ‘n sukses van die spesiale inisiatief te maak.  Die fees gaan op Yonder se terrein aangebied word en sal ‘n eg Noord-Kaapse geur en karakter hê onder die skadu van die Kameeldoringbome.  Die organiseerders beplan ‘n program wat die hele gesin betrek en vermaak, lekker kos, lekker musiek, kunstenaars en ‘n jaarlikse kuier soos net Kimberley kan.

Ons wil graag vir die mense van Kimberley wys dat ‘n persoon met ‘n gestremdheid ‘n geleentheid vir die publiek kan aanbied wat niks kort van ‘n ware fees is nie’, so sê Jannie van Zyl – hoof van die Noord-Kaap Geestesgesondheidsvereniging. Ons wil ‘n geleentheid skep waar plaaslike talent kan skouers skuur met nasionale talent, waar plaaslike besighede ‘n geleentheid kan kry om fondse te genereer hetsy deur verkope op die feesterrein of deur besigheid wat die besoekers na Kimberley bring.

Vanjaar wil ons voortbou op die sukses van verlede jaar en dit groter en beter maak.

  1. Die parkeerarea word vergroot en die ry oppervlak verhard
  2. Die stof word aangespreek
  3. Baie gras is aangeplant
  4. Die eetarea gaan ‘n fees wees

 

2019 Fotos